John.1.1
Matt.19.4; Mark.10.6

Ублапӏэ

Мосэ иапэрэ тхылъ

Библием изэдзэкӏынкӏэ Институтыр Москва 2005

Ублапӏэ

Мосэ иапэрэ тхылъ

Книга Бытия на адыгейском языке

Институт перевода Библии Лицензия № 01271 от 22.03.2000 101000 Россия, Москва, Главпочтамт, а/я 360
Подписано в печать 25.04.2005 Формат 84(108 1/32. Печать офсетная. Усл. печ. л. 7,56. Тираж 1000 экз. Заказ №
Лъытэныгъэ зыфэтшӏырэ тхылъеджэр!
Библием щыщ апэрэ тхылъэу «Ублапӏэ» зыфиӏорэр уапашъхьэ илъ. Библиер ӏахьыгъо инитӏоу гощыгъэ: Ижъырэ Зэзэгъыныгъэр, Къэбарышӏур (Инджыл); тхылъ 60-м къехъоу зэхэт, лӏэшӏэгъубэмэ къакӏоцӏ ахэр цӏыф зэфэшъхьафмэ атхыгъэх. Дунаир къэгъэшӏыгъэу зыхъугъэм къыщегъэжьагъэу зэманыкӏэм иапэрэ лӏэшӏэгъухэм къанэсыжьэу къызэлъаубытрэ хъугъэ-шӏагъэмэ ахэр къатегущыӏэх.
Ижъырэ Зэзэгъыныгъэм къыхиубытэхэрэр: Тауратыр, ащ Мосэ итхылъитфыкӏэ мымакӏэу еджэх, тхьэлӏыкӏомэ ятхылъхэр, гъэсэпэ-тхыдэхэр, тарихъхэр, усэхэр зыдэт тхылъхэр.
«Ублапӏэр» Тауратым иапэрэ ӏахьыгъу. Ар зытхыгъэм ыцӏэ къыриӏорэп, ау адрэ тхылъитфымэ афэдэу, ар Мосэ ытхыгъэу алъытэ. Адыгабзэкӏэ апэрэ тхылъым ыцӏэр «Ублапӏэ», имэхьанэкӏэ «Генезис» (къэхъукӏэр) зыфиӏорэм пэблагъ, ижъырэ урымыбзэкӏэ зэрадзэкӏы зыхъукӏэ, ар агъэфедэщтыгъэ, тхылъым къыӏуатэрэр тефэ хьазырэу ащ къетыжьы.
«Ублапӏэр» шъхьэ 50-у зэхэт, къызтегущыӏэхэрэм ялъытыгъэу ахэр ӏахьыгъо шъхьаӏитӏоу бгощынхэ плъэкӏыщт. Апэрэ шъхьэ 11-мэ Тхьэм мэфихым къыкӏоцӏ Ежь Игущыӏэкӏэ дунаир къызэригъэшӏыгъэр къаӏуатэ: уашъор, чӏыгур, къэкӏыхэрэр, псэушъхьэхэр, чӏыгум иапэрэ цӏыфхэу Адамрэ Хьаомрэ. Дунаим тет цӏыф лъэпкъ пстэури къызтекӏыгъэхэм, Тхьэм иунашъо амыгъэцакӏэу, ӏэдэм чъыгхатэу ежьхэр зыщыпсэущтыгъэхэм дэт чъыгэу шӏумрэ емрэ зэхэозгъэшӏыкӏырэм къыпыкӏагъэр ашхыгъ, ащ къыхэкӏэуи дунаир гунахьшӏэным хащагъ. Ащ къыкӏэлъэкӏох Къаин, Хэбэл, Нухьэ яхьылӏэгъэ къэбархэр, псэкӏодшӏэным зэлъикӏугъэ дунаир ыгъэпщынэнэу Тхьэм псыкъиушхор ащ къызэрэтырищагъэр. Ащ къыхэкӏэу псэ зыпыт пстэури, Тхьэм Иунашъокӏэ Нухьэ псыпхъонтэрым рищагъэхэм анэмыкӏхэр, кӏодыгъэ. Бабилэн плъэпӏэ лъагэм икъэбар къызтегущыӏэрэр цӏыфыр ышъо зэрикӏыгъэм пае Тхьэм ар зэригъэпщынагъэр ары.
«Ублапӏэм» иятӏонэрэ ӏахьэ, я 12-50-рэ шъхьэхэр, Ибрахьимэ пэублэ зыфэхъугъэ джурт лъэпкъыр къызтекӏыгъэхэр ары къызтегущыӏэрэр. Ихьадэгъу егъотыфэ ар Тхьэм фэшъыпкъагъ. Ащ зэрэфэӏорышӏэрэм ишыхьатэу шӏу ылъэгъурэ ыкъо закъоу Исхьакъ Тхьэм къурмэн фишӏыным фэхьазырыгъ. Ащ пае Тхьэм гущыӏэ пытэ ышӏыгъагъ: «Сэ шъыпкъэ дэдэмкӏэ Сынэшӏу къыпщысфэщт. Сэ о птекӏыщт цӏыфхэр згъэбэгъощтых, япчъагъэкӏэ ошъогу жъуагъомэ афэдизэу, хыӏушъо пшахъомэ афэдизэу; о птекӏыщтхэм апашъхьэ пыймэ якъэлапчъэхэр щебэджыщтых. Чӏыгум тет цӏыф пстэуми о уибынхэм яхьатыркӏэ Сынэшӏу ащысфэщт о укъызэрэсэдэӏугъэм пае» (Ублапӏэ 22:17-18).
Ибрахьимэ ехьылӏэгъэ къэбарым ащ ыкъоу арабхэр къызтекӏыгъэ Исмахьилэ къырыкӏуагъэр къегъэлъагъо. Ащ къыкӏэлъыкӏоу «Ублапӏэм» Исхьакъ, ащ ишъузэу Рыбкъэ, икӏалэу Якъубэ ятарихъ къеӏуатэ. Исхьакъ джурт лъэпкъым илӏэуж пшӏыкӏутӏумэ ыкъохэмкӏэ пэублэ афишӏыгъ. Ахэмэ псэупӏэ афэхъугъэр къэнаӏан чӏыгур ары. Ащ щыщыгъэх джырэ Палестинэмрэ Израильрэ.
«Ублапӏэм» иаужырэ шъхьэхэр Якъубэ ыкъо анахьыкӏу Юсыф фэгъэхьыгъэх. Юсыф кӏэлэ ӏэтахъоу ышхэм ар Мысырым гъэрэу исынэу аращэ. Ау ищыӏэныгъэкӏэ зэрихьылӏэгъэ къиныгъо пстэуми апэшӏуекӏозэ, ар лъэгэпӏэ инмэ анэсы, Мысырым игъэӏорышӏакӏо мэхъу.

Дэтхэр

Апэу къэгъэшӏыгъэ дунаимрэ цӏыфымрэ ятарихъ     (я 1-11-рэ шъхьэхэр).
Дунаир къэгъэшӏыгъэ зэрэхъугъэр     (я 1-2-рэ шъхьэхэр).
ӏэдэм чъыгхатэмрэ ӏэдэм чъыгхатэм къызэрэдафыгъэхэмрэ     (я 3-4-рэ шъхьэхэр).
Адам къыщегъэжьагъэу Нухьэ нэс     (я 4-5-рэ шъхьэхэр).
Цӏыфхэр япсэупӏэкӏэ чӏыгум щыгощыгъэ зэрэхъугъэхэр     (я 6-10-рэ шъхьэр).
Бабилэн плъэпӏэ лъагэр. Щэм къыщегъэжьагъэу Ибрам нэс     (я 11-рэ шъхьэр).
Исраил илӏэужхэр     (я 12-36-рэ шъхьэхэр).
Ибрам къеджэхи, нэшӏу зэрэщафагъэр     (я 12-18-рэ шъхьэхэр).
Сэдомрэ ӏаморэрэ якӏодыкӏ     (я 19-рэ шъхьэр).
Ибрахьимэрэ Абимэлэхрэ     (я 20-рэ шъхьэр).
Исхьакъ икъэхъукӏэрэ Ибрахьимэ зэраушэтыгъэмрэ     (я 21-22-рэ шъхьэхэр).
Сарэ зэрэлӏагъэр     (я 23-рэ шъхьэр).
Исхьакъырэ Рыбкъэрэ     (я 24-26-рэ шъхьэхэр).
Якъубэ нэшӏущыфэныгъэмкӏэ щыпэлъфыныгъэр зэрэзэригъэгъотыгъэр     (я 27-рэ шъхьэр).
Якъубэ Лабан дэжь щыӏ; Якъубэ ишъузхэмрэ ыкъохэмрэ     (я 28-31-рэ шъхьэхэр).
Якъубэ къызэригъэзэжьыгъэр     (я 32-35-рэ шъхьэхэр).
ӏэсау къытекӏыгъэхэр     (я 36-рэ шъхьэр).
Юсыфрэ ащ ышхэмрэ     (я 37-50-рэ шъхьэхэр).
Юсыф шӏэгъо дэдэу зызэриӏэтыгъэр     (я 37-41-рэ шъхьэхэр).
Юсыф ышхэр зэраушэтыгъэхэр     (я 42-45-рэ шъхьэхэр).
Мысыр хэгъэгум Якъубэ къыщытекӏыгъэхэр     (я 46-50-рэ шъхьэхэр).
Ижъырэ джутыбзэмкӏэ атхыгъэ ӏэпэрытхым (масорет ӏэпэрытхым) техыгъэу тхылъыр адыгабзэкӏэ зэдзэкӏыгъэ. Тэ зэтыдзэкӏыгъэр чӏыпӏэ зырызхэмкӏэ Урыс синодым зэраригъэдзэкӏыгъэ Библием текӏы.
Библием хэт термин зырызхэу адыгабзэкӏэ къэпӏон умылъэкӏыщтхэр къэозгъэшӏэрэ тамыгъэхэмкӏэ хэгъэунэфыкӏыгъэхэу къарыкӏырэр къэӏотэжьыгъ.
Ижъырэ джуртыцӏэхэр адыгабзэм имэкъэ къэӏокӏэ шапхъэмэ атетэу тхыгъэх.
Библием изэдзэкӏынкӏэ Институтыр «Ублапӏэр» тхылъеджэмэ агу рихьынэу мэгугъэ, анахьэу ар зыфэгъэхьыгъэу къатӏорэр Тхылъ Лъапӏэмрэ Тхьэм иӏэмыркӏэ къэгъэшӏыгъэ дунаим итарихърэ ашӏогъэшӏэгъонэу зэзгъашӏэхэрэр ары.
Библием изэдзэкӏынкӏэ Институтым зэдзэкӏакӏохэм, редакторхэм, апэрэ мафэхэм къащегъэжьагъэу зэкӏэ тхылъым ӏоф дэзышӏагъэхэм, ащ икъыдэгъэкӏын хэлэжьагъэхэм зэрафэразэр ареӏо. Адыгэ тхылъеджэм ащ нэӏуасэ фэхъунэу амал иӏэ зэрэхъугъэр лъэшэу тигуапэ.
Библием изэдзэкӏынкӏэ Институтыр

Ублапӏэ

Мосэ иапэрэ тхылъ

ISBN 5-93943-077-5
© Библием изэдзэкӏынкӏэ Институтыр, Москва, 2005


Ижъырэ Зэзэгъыныгъэр
http://ibt.org.ru/bible
Ублапӏэ, Мысырикӏыжь, Рут, Апэрэ Самуел, Ятӏонэрэ Самуел, Апэрэ тхылъыр, Ятӏонэрэ тхылъыр, Эстэр, Ушъый гъэсэпэтхыдэхэр, Тхьэлӏыкӏоу Юныс, Пегъымбарэу Даниел


Creative Commons: by-nd: © Institute for Bible Translation; This work is licensed under the Creative Commons Attribution-NoDerivatives 4.0 International License. To view a copy of this license, visit http://creativecommons.org/licenses/by-nd/4.0/.

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
back
close
:
prev / next

Тхьэм дунаир къызэригъэшӏыгъэр

1 Ублапӏэм Тхьэм уашъомрэ чӏыгумрэ къыгъэшӏыгъэх.
2 Чӏыгум гъэпсыкӏэ иӏагъэп ыкӏи нэкӏыгъэ, шӏункӏыр чӏэ зимыӏэм шъхьэщытыгъ; Тхьэм Ыпсэ псымэ акӏыӏу щыхьарзэщтыгъэ.
3 Тхьэм ыӏуагъ: «Нэфынэр къэрэхъу». Нэфынэр къэхъугъ.
4 Нэфынэр зэрэдэгъур Тхьэм ылъэгъугъ; Тхьэм нэфынэр шӏункӏым къыгуигъэкӏыгъ.5 Нэфынэм «мафэкӏэ» Тхьэр еджагъ, шӏункӏым «чэщкӏэ» еджагъ. Пчыхьэ къэхъугъ, пчэдыжь къэхъугъ – апэрэ маф.
6 Тхьэм ыӏуагъ: «Псым ыгузэгу, псыр тӏоу ыгощэу, ошъо гъэӏагъэ щэрэӏ».
7 Тхьэм ошъо гъэӏагъэ ыгъэпси, псэу ошъо гъэӏагъэм ычӏэгъ чӏэтыр псэу ошъо гъэӏагъэм ыкӏыӏу щыӏэм гуищыгъ. Аущтэуи хъугъэ.8 Тхьэр ошъо гъэӏагъэм «уашъокӏэ» еджагъ. Пчыхьэ къэхъугъ, пчэдыжь къэхъугъ – ятӏонэрэ маф.
9 Тхьэм ыӏуагъ: «Уашъом ычӏэгъ псэу чӏэтыр зэкӏэ зы чӏыпӏэ орэхъуи, гъушъапӏэр къэрэлъагъу». Аущтэуи хъугъэ.
10 Гъушъапӏэм Тхьэр «чӏыгукӏэ» еджагъ, псэу зэхэлъэдагъэмэ «хыкӏэ» яджагъ. Ар зэрэдэгъур Тхьэм ылъэгъугъ.11 Тхьэм ыӏуагъ:
«Къэкӏыхэрэр чӏыгум къерэгъэкӏых: кӏэ зиӏэ уцхэри чъыг лъэпкъ зэфэшъхьафхэу кӏэ зиӏэ пхъэшъхьэ-мышъхьэ къызпыкӏэхэри». Аущтэуи хъугъэ.
12 Чӏым къэкӏыхэрэр къыгъэкӏыгъэх: кӏэ зиӏэ уц лъэпкъ зэфэшъхьафхэри кӏэ зиӏэу, пхъэшъхьэ-мышъхьэ къызпыкӏэрэ чъыг лъэпкъ зэфэшъхьафхэри. Ар зэрэдэгъур Тхьэм ылъэгъугъ.13 Пчыхьэ къэхъугъ, пчэдыжь къэхъугъ – ящэнэрэ маф.
14 Тхьэм ыӏуагъ: «Мафэмрэ чэщымрэ зэфэшъхьаф ашӏынхэу, ошъо гъэӏагъэм нэфынэхэр къыщэрэхъух, пӏалъэхэр къагъэлъэгъонхэу, мафэхэр, илъэсхэр къагъэнэфэнхэу тамыгъэ орэхъух.
15 Чӏыгур къагъэнэфыным пае ошъо гъэӏагъэм а нэфынэхэр къыщэрэнэфых». Аущтэуи хъугъэ.16 Тхьэм нэфынэ инитӏу къыгъэшӏыгъ: нахь иныр – мафэр зэригъэзекӏонэу, нахь цӏыкӏур – чэщыр зэригъэзекӏонэу; жъуагъохэри къыгъэшӏыгъэх.17 Ахэр Тхьэм ошъо гъэӏагъэм зыкӏытыригъэуцуагъэхэр чӏыгур къагъэнэфынэу,18 мафэмрэ чэщымрэ зэрагъэзекӏонхэу ыкӏи нэфынэр шӏункӏым гуащызэ ашӏынэу ары. Ар зэрэдэгъур Тхьэм ылъэгъугъ.19 Пчыхьэ къэхъугъ, пчэдыжь къэхъугъ – яплӏэнэрэ маф.
20 Тхьэм ыӏуагъ: «Псэ зыпытхэр псым хиз орэхъу. Чӏым ышъхьагъ ошъо гъэӏагъэм бзыухэр щэрэбыбых».
21 Тхьэм къыгъэшӏыгъэх хым хэс шъэджашъэхэр, нэмыкӏ псэушъхьэ лъэпкъ зэфэшъхьафхэу псым бэдэдэ хъухэу щызекӏохэри тамэ зиӏэ бзыу лъэпкъ зэфэшъхьафхэри. Ар зэрэдэгъур Тхьэм ылъэгъугъ.22 Тхьэм ынэшӏу ахэмэ ащифи, ыӏуагъ: «Зыжъугъэбагъу, зыхэжъугъахъу, хыпсыхэм ахизы шъухъу. Бзыухэри чӏым щэрэбагъох».23 Пчыхьэ къэхъугъ, пчэдыжь къэхъугъ – ятфэнэрэ маф.
24 Тхьэм ыӏуагъ: «Псэ зыпыт лъэпкъ зэфэшъхьафхэр чӏым къерэгъэхъух: былымхэр, цохъорэ-пшырэ псэушъхьэхэр, хьакӏэ-къокӏэ зэфэшъхьафхэр». Аущтэуи хъугъэ.
25 Тхьэм къыгъэхъугъэх хьакӏэ-къуакӏэхэр, былым зэфэшъхьафхэр, чӏыгум щыцохъорэ-щыпшырэ псэушъхьэ зэмылӏэужыгъохэр. Тхьэм ылъэгъугъ ар зэрэдэгъур.
26 Тхьэм ыӏуагъ: «Къэдгъэшӏын цӏыфыр, Тэ титеплъэу, Тэ тяхьщырыр, хыхэм ахэс пцэжъыехэм, ошъогу бзыухэм, былымхэм, зэкӏэ чӏыгуми чӏыгум зэкӏэ щыцохъорэ-щыпшырэ псэушъхьэхэми тетыгъо афыриӏэнэу».
27 Джаущтэу Ежь итеплъэу цӏыфыр
Тхьэм ар къыгъэшӏыгъ,
Ежь итеплъэу къыгъэшӏыгъ ар,
къыгъэшӏыгъ хъулъфыгъи Ащ,
бзылъфыгъи къыгъэшӏыгъ.
28 Тхьэм ынэшӏу ахэмэ ащифи, ариӏуагъ: «Зыжъугъэбагъу, зыхэжъугъахъу, чӏыгум тиз зышъушӏи, ар шъуӏэ къижъугъахь, тетыгъо афышъуиӏ хым хэс пцэжъыехэм, ошъогу бзыухэм, сыд фэдэрэ псэушъхьэу чӏыгум тет пстэуми».
29 Тхьэм ыӏуагъ: «Мары къышъостыгъ шъушхынэу кӏэ зиӏэ уцэу зэкӏэ чӏыгум тетыр, сыд фэдэрэ чъыги кӏэ хэлъэу къызпыкӏэрэр.30 Хьакӏэ-къуакӏи, бзыуи, чӏыгум щыцохъорэ-щыпшырэ сыд фэдэрэ псэушъхьи – псэ зыпытэу чӏыгум тет пстэуми – Сэ ашхынэу уц шхъуантӏэр ястыгъ». Аущтэуи хъугъэ.31 Тхьэм зэкӏэ къыгъэхъугъэхэр къыплъыхьагъэх – зэкӏэри дэгъу дэдагъ. Пчыхьэ къэхъугъ, пчэдыжь къэхъугъ – яхэнэрэ маф.
prev / next