Luke.3.1
Luke.2.1; Luke.3.1
Luke.1.26; Luke.2.11; Luke.1.27
Luke.2.4
Luke.2.12; Luke.2.16; Luke.22.11
Luke.24.4; Luke.9.31
Luke.2.32
Luke.2.4; Luke.23.2; Luke.1.43
Luke.2.7
Luke.19.38; Luke.10.21; Luke.10.21; Luke.1.79; Luke.3.22; Luke.12.32
Luke.2.7; Luke.2.12
Luke.2.51; Luke.1.66
Luke.7.16
Luke.1.59; Luke.1.31
Luke.2.21; Luke.2.27
Luke.2.39
Luke.2.23
Luke.1.6; Luke.2.38; Luke.23.51
Luke.9.20; Luke.23.35
Luke.2.33; Luke.2.41; Luke.2.43; Luke.2.48-Luke.2.51
Luke.1.64
Luke.2.26
Luke.3.6
Luke.24.47
Luke.2.10
Luke.2.27
Luke.5.33
Luke.2.25; Luke.1.68
Luke.2.23; Luke.2.4
Luke.1.80
Luke.2.27
Luke.2.41
Luke.5.17
Luke.2.27; Luke.2.49
Luke.13.33
Luke.18.34
Luke.2.19

ИНДЖИЛ

Лукайин Китаб Месигь Іисайихъас Идже Хабар

ХІуьлматлу дусттар!

Гьеме китабис агъая Инджил. Инджил Библияйин пай э. Гьегишттин паяр э гин Тавратна Забурра. Библия дуьнйайиъ ке куьгьна, ке ппара хура гирами китаб э.
«Инджил» – «Идже Хабар» агъа чІал э. Іисайи Учи э Учин ягІар акьувеларис «Идже Хабар» пунаеф. Инджилик ахъаркьая Іисайин Іуьмурдихъас, Гин курарихъас, Гин ягІар акьувеларихъас, Ги аркьай хьуна Іеламатарихъас, Гин Іеджалихъасна хаб Гик джан керхьубахъас.
Инджилик ахъаркьая курар хьунаф Іу агъзур исан удигьай э Палестинайиъ. Ге вахттариъ Палестина ккехьуная Римдин паччагьарин гъиликк. Амма гисаъ ешемиш вея джугьутІари чиппин дин ухІуная, Аллагьди чиппис пайгъамбар Мусайилас гьикуна Закуниъ аягъилди аркьай. Мусайин кьабахъай ацІуна пайгъамбарари агъай хьуная Месигь адесе пуна, Аллагьди ГІаттивунаф, инсанар гунагьарикесна Іеджаликес ккеттивас. Авалдин Палестинайин Вифлеем агъа хІуриъ хуная Месигь, Іиса. Месигьахъас идже хабар э, гьер инсандис идже хабар, нандиъ инсан ешемиш вей айчира, нае чІалалди гъургъай айчира.
Инджилин китабар хъара ая. Ме Инджилин китаб ликІинаф Лукайи э. Лука идже хуру инсан хьуная, духттур хьуная ге. Лукайи учин китаб лиркІенгуна удигьас пуная, учи кІилди Іисайихъас ягІар акьуне пуна, Іиса ягІа инсанарихъай гъургъуне пуна.
Іу агъзур исан удигьай Инджил ликІина ахьуная грек чІалалди, агьал Инджил ая дуьнйайин ацІун чІаларилдира. Магьа гьал агъул чІалалдира ая Инджил.
Инджилик кея сад-Іуд четин гафар. Ге четин гафар ликІиная ме китабик сасра хатІулди (чешнайилди). Гебурин мегІна кея ме китабин кьабахъ.
Библия тарджума аркьа институти тарджума акьуттисра, редакторарисра, гьеме китаб агъул чІалалди адихьас кумак акьу инсанарисра чухсагъул агъая. Че муш кея гьеме идже хабарин китаб агъул чІалалди аттархьуна, агъулар шад хьасе пуна.
Библия тарджума аркьа институт

Агъул чIал
http://ibt.org.ru/bible
Лукайин Китаб Месигь Іисайихъас Идже Хабар


Copyrighted: © Библия тарджума аркьа институт, 2005

Библия тарджума аркьа институт
Институт перевода Библии, 101000 Москва, Главпочтамт, а/я 360
ibt_inform@ibt.org.ru
back
close
:
prev / next

Хуная Іиса

1 Те вахттуни Август агъа паччагьди буюрмиш акьуная, сан аркьай ликІен пуна джалла учин джилил ешемиш веядегьен инсанар.
2 Гиштти сан аркьаяф инсанарин садпегелай хьуная Сирия агъа хІуькуматтин хІаф Квириний идегуна.3 Джаллабур ушуная чаб учётариъ ихьас чиппин шагьурариди, хІурариди, гьерф учин дадарин ватандилди.
4 Юсуфра ушуная Галилея дерейин Назарет агъа хІуриас Ягьудеяйиди, Вифлеем агъа Давудан хІуриди, Юсуф уч Давудан тухумдиас идехІела.5 Юсуфахъай ушуная гин фуни ая хьир Майрамра.6 Са чІукь гагьдилас Вифлеемдиъ хъучадиная хьиран руха вахттар.7 Хуная Майрамас садпе шиниккв – кІиркІ. ГІадиджина чаппаригІ, икІуная ги шиниккв тІунаъ, гІалашувар гъурзан хулаъ мукь ахьуна адава гебурис.

Малайикари хІуьппехъенарис акьуна идже хабар

8 Майрамна Юсуф ая мукьуйигьас Іайи варха давай хІуьппехъенар алхьуная чІирил Іуьшан къаравулдиъ.
9 Сад пуна, заварин нур ичай, бадил хьуная гебурин удигьди малайик. ГучІ хьуна тІушас девей гъузуная хІуьппехъенар.
10 – Чвас гучІ мева, – пуная гебурис малайикди. – Зун кІилди инсанарис, идже хабар фай адинафе.11 ЯгІа Давудан хІуриъ Вифлеемдиъ хуная Месигь, инсанар УхІаф.12 Чвас те Шиниккв магьмилди ягІархьасе: чаппаригІ гІадиджина тІунаъ ахьасе Те.
13 Садпуна ге малайикдин багуливди бадил хьуная хъара ппара малайикар, дуьгІебура аркьай:
14 – Шукур варттал але Аллагьдис.
Дуьхьуьвелна нуьхІуьбат Аллагь рази ая джилил аледегьен инсанарис.
15 Малайикар уларигьас гулугуна, хІуьппехъенари пуная:
– Див хьин, хьес Аллагьди акьуна хабарихъди Вифлеемдиди вес, агвас тисаъ хьунаеф.
16 ТегІди кей учІуная хІуьппехъенар рекъуьъ. Адегуна, джикІиная гебури Юсуфна Майрам. ТІунаъ икІуна бицІи шиникквра ахьуная.17 Шиниккв агуф, хІуьппехъенари ахъакьуная чиппис малайикди Ге Шиникквдихъас петтар.18 Джалла юркІв алийинаттар муьхІтал хьуна гъузуная, хІуьппехъенари файдина хабарил.19 Майрама кІилди ге курар учин юркІураъ икІуна атуная.20 ХІуьппехъенар адиная хаб алдаркуна, шукур аркьай Аллагьдисра, кІилди чиппис агуттарисра унихьуттарисра. Малайикди гебурис пунагъилди хьуная.
21 Муйе ягъалас суннат аркьа вахтт хьегуна, алихьуная шиникквдил ттур Іиса. Фуниъ хьастти алийина ттур хьуная ге малайикди.

Іиса Аллагьдис бахш акьуб

22 Шиниккв хуна хумбеф мертт вере вахтт алттархьегуна, Юсуфана Майрама, Мусайин закунилди, файдиная Шиниккв Ерусалимдиди Аллагьдис бахш акьас,
23 Аллагьдин закуниъ ликІинагъилди: «Гьертти учин садпе кІиркІ бахш акьуна кканефе Аллагьдис»,24 садакьара акьас, Аллагьдин закуниъ пунагъилди: «Іу гІуд я луфуран Іу чарккв».
25 Ахьуная те вахттуни Ерусалимдиъ Симеон агъа са инсан. Ге хьуная Аллагьдин юлайиъ ай дуз юркІуран инсан, гъузунаф Аллагьдин Кумакихъ Іизраилдис. Гил алхьуная Аллагьдин РуьхІ.26 Симеонас Аллагьдин РуьхІди пуна ахьуная:
– Вун кІесттава Месигь дагуна.
27 Аллагьдин РуьхІди ях агъаф суман, адиная ге Аллагьдин хулади. Гьеге ягъа Юсуфана Майрама файдиная гич бицІи Іиса, закуниъ агъилди акьас пуна.28 Гебур ачадегуна, Симеона училди гъушуна Шиниккв, шукур акьуна Аллагьдис, пуная:
29 – Гьал Вун фартая юркІв сакинди Ве лукІ, Аллагь ТегІела. Аларкьуне Вун пуна гаф:
30 Зе уларис агуне инсанар УхІаф,
31 Вун джалла халкьарис гьикунаф.
32 Іекв, кІилди халкьарин улар дархъаф,
ТегІрифе, Ве Іизраилдин халкьдин.
33 Дадна баб муьхІтал хьуная Симеона Шиникквдихъас петтарил.34 Симеона гебурис хайир дуьгІера акьуна, Майрамас, Гин бабас, пуная:
– Ме Шиниккв багьана хьуна, ппара инсанар Іизраилдиъ ахтт хьасе, ацІунттар Гин кумак фай гъайшасе. Михъас ппара хІуьджатар, гъургъубар хьасе,
35 ве юркІураас ханджал аттирхІу суман хьасе вас джуьреттарин юркІураъ ая джинабан хиялар ягІархьегуна.
36 Гисаъ ахьуная пайгъамбар Аннара, Фануилан руш, Асиран тухумдиас. ХІа яшарин Іуьссе хьир хьуная ге, шувас ушуна ери исалас джигьилди ами ашкІин хьунаеф.37 Аме Іуьмур фатуная ги ашкІинди. МайцІурна якьу ис хьуная гин. Сивара ухІай, дуьгІебура аркьай, гьемишан Аллагьдин хулаъ ахьуная Анна.38 Те арайи Аннара гьучушуна гебуригьди шукур акьуная Аллагьдис. Ерусалимдис Кумакихъ гъузунадегьен инсанарис ахъакьуная Аннайи ге шиникквдихъас.

Юсуфна Майрам хаб адиная Назаретиди

39 Аллагьдин закуниъ пунадегьенттара акьуна, адиная Майрамна Юсуф Галилея дерейиди, чиппин Назарет агъа хІуриди.
40 Шиниккв хІа вей батІар джанра акьуная, фагьумра ппара хьуная, Аллагьдин дуьгІебурин иджвел алхьуная Гил.

Іиса ахьуная Аллагьдин хулаъ

41 Гьер иса Іисайин дадар-бабар вей хьуная Ерусалимдиди Пасхайин хІа-ягъас.
42 Іисайин цІеІу ис хьегуна, адиная гебур, гьемишан чаб верегъилди суман, хІа-ягъарис Ерусалимдиди.43 ХІа-ягъар кІиркІухаб, дадна баб ушуная хулади, Іиса экьуная Ерусалимдиъ. Дадар-бабарис ягІай хуна адава, Ге тисаъ амеф.44 Гебурин фикир хьуная джуьре инсанаригІай рекъуьъ ай Ме пуна. Гиштти ушуная мебур кІилин ягъди. Хабди, руцуная Майрамна Юсуф Гихъас багунттаригІ, ягІаттаригІ.45 ДаджикІина, хаб адиная мебур Ерусалимдиди Гихъас руцас.46 Хьибу ягъалас джикІиная мебурис Ге Аллагьдин хулаъ. Ге гІахьуная мегІелимаригІ, гебурил юркІв алийина, гебурис суалар ирцІанди.47 Джалла Гил юркІв алихьунаттар муьхІтал вей хьуная Гин фикирарил, Гин гъургъубарил.48 Дадна баб ппара муьхІтал хьуная Ге агуф. Баба пуная Гис:
– Е зе кІиркІ, Вун фас миштти акьуфе час? Ве дадра зунна гъамар аркьай руцай уйи Вахъас.
49 Іисайи гебурис пуная:
– Фас руцаттар э чун Захъас? Чвас ягІай адавуйив Зун Зе Дадан хулаъ ахьуна кканеф?
50 Гебур гъавурдиъ архьуна адава Іисайи чиппис петтин.
51 Іиса адиная гебурихъай Назаретиди, гебурин юлайиъ ахьуная Ге. Джалла хьунаттар Іисайин баба учин юркІураъ икІуна атуная.52 Іиса хІа вей, Іисайин фагьумра ппара хьуная, батІар джанна акьуная. Іиса кканхьуная Аллагьдисра, инсанарисра.
prev / next