Җы зусы жәту дэ йүәлён.

John.1.1

Matt.19.4; Mark.10.6

Торати Китабу

(Датуршон, Җефон, Левит,

Исраилжынмуди фур, Чунфә фалү)

На хуэйзў йүян фанхади

Ба зыҗиди пинлүн җочў җыгә җўхо дафадилэ:

ibt_inform@ibt.org.ru

ISBN 978-5-93943-176-7

Гуйҗун Китабушон зандёди минзыди цыйзы

Датур – Датуршон

Җефон – Җефон

Левит – Левит

Фур – Исраилжынмуди фур

Фалү – Чунфә фалү

ТОРАТИ КИТАБУ

Датуршон, Җефон, Левит,

Исраилжынмуди фур,

Чунфә фалү

Фанйи Китабуди Янҗюйүан

2011

Мулў

Щүян	7
Датуршон	9
Җефон	120
Левит	218
Исраилжынмуди фур	285
Чунфә фалү	376
Хуадян	456

Щүян

Гуйҗун нянҗяму!

Нимуди мянчян на хуэйзў йүян ту йихуэй фанхади Торати Китабу. Тасы Гуйҗун Китабуди йигә буфын. Хўда ги жынму ба дин ёҗинди Фу гигили – җысы Гуйҗун Китабу. Тасы зэ йиче шыҗешон дин нянди дэ зунхўди, йинцысыдо дун-яди сангә дин дади җёмыншон – җысы яхўти, христиан дэ ислам – йиче Гуйҗун Китабу хуэйҗәсы тади юди буфынсы гуйҗунди.

Мый йигә жын, булүн та зэ натар җў, тасы найигә минзўди дэ щинфу нагә җёмын еба, ё зо йигә нынгу ба җыгә фу на зыҗиди фуму йүян няншонни. Гуйҗун Китабу ги йиче сыхуршон җўди жынмуди заён вынти ги хуэйдадини: замуда натар лэди, виса заму хуәдини, виса зэ шыҗешон җымущезы ха сыюр, жын вучонлиди йиху са ба та дындини.

Гуйҗун Китабу литу ю 60 дуә бын фуни, ба таму гәён Хўдади шынжынму хын дуәди быйн яншон щели. Та ба зоха шыҗе до заму шыдэди ту йигә быйн яншонди сычин либян тифәдини.

Ба Гуйҗун Китабу нын фынчын лёнгә да буфын. Зэ ту йигә буфын литу ю Торати, Зэбур, шынжынмуди фу дэ лисы фуни. Ди эргә буфынсы Инҗил (ба Инҗил кәҗя фандо хуэйзў йүяншонли). Торати Китабу – җысы Хўда ги Муса шынжын гихади ву бын фалү фу: Датуршон, Җефон, Левит, Исраилжынмуди фур дэ Чунфә фалү (ги мый йи бын фу вәму щелигә байир щүян).

Җы ву бын фу гуон бусы кэтурди, таму хансы йиче Гуйҗун Китабуди җун-ё фу. Зэ таму литу тифәдисы: замуҗя Хўда ба дун-я дэ жынму зохали, замуҗя жынму зэ дун-яшон санкэли, замуҗя таму гантуә гўнахарли, замуҗя Хўда ба Гәҗяди минжын җянчўлэ, лян таму динли хәтунли зэмусы ги таму ба Тади фалү гигили.

Торати Китабусы на гўдэ яхўти йүян щехади. На хуэйзў йүян фан җыгә фуди сыхур, сыйүн гўдэ яхўтиди бынвынли. Нянҗяму дан ба замуҗяди хуади йисы бу җыдоли, таму нын зэ җы йи бын фуди йирди хуадяншон ба таму зоҗян.

Фанйи Китабуди Янҗюйүан ги фанйижынму, бянҗижынму зэмусы ги шелүха чўбан җы бын фуди сыхур бонли монди жынму чынщин дощедини.

Хуэйзўжынму ба җы йи бын фу надо шуни дансы нян, җыгә до вәмушонсы да щихуан.

Фанйи Китабуди Янҗюйүан.

Хуадян

ДАТУРШОН

Датуршон фуди щүян

Торати Китабу лян Датуршон фу кэсыдини. Җысы Муса фалү литуди ту йи бын фу (на яхўти хуа «Торасы» җётё хуэйҗәсы фалү).

Датуршон фу на яхўти йүян ю гәҗяди минзыни – җысы «Берешит» (зусы «Датуршон»), на грек йүян «Генесис» (зусы «Фасын»). Зэ җы йи бын фу литу фәдисы шыҗе, димян, жынзў, Исраил минжын чўшы либян сычин.

Фуди туршон (1-11 буфын) тифәдисы замуҗя Хўда лян Тади хуа ба чүан шыҗе зохали. Кәсы Хўдади вида гуон бусы зэ җыгәшон. Суйжан жынму ба гўнахар ганха да Та гынчян лийүанли еба, кәсы Хўда ба та зохади жынму мә лёхади, хан цощиндини. Вончян чиди шыҗеди йиче лисы – җысы Хўда дэ жынму җунҗянниди лянщи.

Йиху зэ җёнфә литу (12-50 буфын) тифәдисы нэще жын, ба сый Хўда җянчўлэли, җё тамуди хубый чынха Тади минжынни. Зэ Ибращимэ, Исхар, Ягўбэ дэ Ягўбэди шы эргә эрзы сынхуә либян щёфә литу фәдисы Хўда ги таму гихади щүян: тамуди хубый чынха фур дуәдини, ба Хўда ги таму щүхади нэгә димян җаншонни, таму ги йиче жынзў чынха бэрэкэтини. Суйжан таму бусы дин ходи жынму еба, зэ Датуршон фу литу заму ба тамуди ванҗён дэ бухо ганбан е няндини, – кәсы таму ги Хўдади җёхо гили хуэйдали, зунхў Тали.

Зэ Датуршон фу литу нын канҗян гәшы-гўёнди тицэ дэ ще фуди ёнзыни, – җы есы дащихуанди щүфә, есы җүнмый щёфә, есы минзў дэ жынмуди миндан, есы сывын ёнзыди панвон. До вәмушон бу гуанван, йинцысы йиче бынвын лян хуа гынзыди фашу тянмандини. Билүн, зо жынди сыхур (жын на яхўти хуа фәдисы «Адам»), Хўда ба та лян тў зўшонли (на яхўти хуа тўсы «Адама»; Датур 2:7). Ди эрлэ, жын ё вуло җыгә тў дини (2:5, 3:23), ди санлэ, вучонлиди йиху, та йүан хуэйдо тў ди литуни (3:19). Җымуҗяди хуа гынзыди фашу ба щүфә вон хони дабандини, хан ба зуәзоҗя фәди вонщён е җё вон хони дунни. Юди сыхур хуа гынзыди фашу бёфә минзыди хуэйҗәсы дилищүә минзыди чўшыдини. Билүн, Вавилон чынпуди минзы на яхўти хуасы «Бавел» да «балал» («хуәдё» дунцышон чўлэли) нын бёфә замуҗя Хўда зэ нэтар ба димяншон җўди йиче жынди йүян хуәдёли зэмусы вон натар ба димяншонди йиче жын сакэли (11:9). Кәсы ба җыгә хуа гынзыди фашу дансы фанчи, дуәди сыхур фанбугуәлэ. Зэ җыгә фанйишон ба җымуҗяди җун-ё чинкуон е зыгидини.

Хуэйзў йүян

http://ibt.org.ru/bible

Хуэйзў йүян: Торати Китабу, Сульманэди Цунмин Хуа

Creative Commons: by-nd: © Institute for Bible Translation; This work is licensed under the Creative Commons Attribution-NoDerivatives 4.0 International License. To view a copy of this license, visit http://creativecommons.org/licenses/by-nd/4.0/.

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru

back

Go to next chapter Go to previous chapter

Highlight next verse Highlight previous verse

Add another text Turn headings on or off Turn footnotes on or off Turn cross-references on or off Turn dictionary links on or off Turn verse numbers on or off Turn original language links on or off Turn red words of Christ feature on or off

Remove column

← prev / next →

Замуҗя Хўда ба тян, димян дэ таму литуди йиче дунщи зохали

¹ Датур Хўда ба тян дэ димян зохали.² Димянсы луандундунди зэмусы кунди, йикуэзы хинан зэ мәйир кын готуни, Хўдади Лин зэ фи мяншон фидини.³ Хўда фәсы:

– Җё гуонлён юха.

Гуонлён зу юли.⁴ Хўда канҗян гуонлёнсы ходи, ба гуонлён лян хинан фынкэли,⁵ ба гуонлён җёчын быйтянли, ба хинан – еванли.

Хушон долэли, ганзо е долэли – җысы ту йитян.

⁶ Хўда фәсы:

– Җё тян динзы зэ фиди донҗунни юха, җё та ба фиди шонха фынкэ.

Зу җымуҗя чынли.⁷ Хўда ба тян динзы зохали зэмусы ба дихади фи да тян динзы готуди фи фынкэли. Зу җымуҗя чынли.⁸ Хўда ба тян динзы нанчын «тянли». Хушон долэли, ганзо е долэли – җысы ди эртян.⁹ Хўда фәсы:

– Җё тян дихади фи шудо йичур, җё ган ди чўлэ.

Зу җымуҗя чынли.¹⁰ Хўда ги ган ди нанлигә минзы «димян», ба шуцуанди фи җёчын «хэли». Хўда канҗянли, жыгә дуәму хо.

¹¹ Йиху Хўда фәсы:

– Җё зэ димяншон заёнди цому җончўлэ: ги зырди цомё зэмусы җочў гәҗяди ёнзы ги зырди заён фу. Тади зыр зэ тади готян литуни.

Зу җымуҗя чынли.¹² Димян ба цому сынчўлэли: җочў гәҗяди ёнзы ги зырди цомё зэмусы җочў гәҗяди ёнзы ги зырди заён фу. Тади зыр зэ тади готян литуни. Хўда канҗянли, жыгә дуәму хо.¹³ Хушон долэли, ганзо е долэли – җысы ди сан тян.

¹⁴ Хўда фәсы:

– Җё тян динзышон ю гуонлён, ба быйтян дэ еван фынщёкэ, ба жызы, сыҗи дэ нянщян зыги.¹⁵ Җё гуонлён зэ тян динзышон, зущён дын йиён, ба димян жолён.

Зу жымужя чынли.¹⁶ Хўда ба лёнгә да гуонлён зохали: дади – җё пый быйтянни, щёди – жё гуан еванни зэмусы ба щинщю зохали.¹⁷ Хўда ба таму гәдо тян готули, җё таму җо димянни,¹⁸ гуан быйтян дэ еванни зэмусы җё ба гуонлён лян хинан фынщёкэни. Хўда канҗянли, җыгә дуәму хо.¹⁹ Хушон долэли, ганзо е долэли – җысы ди сы тян.

²⁰ Хўда фәсы:

– Җё фи литуди заён хуәвар фандандан. Җё чёр да димян готу вон тяншон фи.

²¹ Зэмусы Хўда хан ба хэ литуди хын дади есын, зэ фи литу фанданданди гәён хуәвар дэ заён чёр зохали. Хўда канҗян җыгә дуәму хо,²² зу ги таму гили кухуанли:

– Ниму вон дуәни йин, ба хэниди фи җанман, җё чёр зэ димяншон е вон дуәни йин.

²³ Хушон долэли, ганзо е долэли – җысы ди ву тян.

²⁴ Хўда фәсы:

– Җё димян ба заён хуәвар сынчўлэ: сынлин, пачун дэ заён есын.

Зу җымуҗя чынли.²⁵ Хўда зэ дишон ба заён есын, сынлин, пачун дэ хуәвар ду зохали. Хўда канҗянли, җыгә дуәму хо.

²⁶ Хўда фәсы:

– Җё Заму җочў Замуди ёнзы дэ щёнфа ба жынму зоха, җё таму гуан йиче хэниди йү, тяншонди чёр, йиче димянди сынлин, есын дэ пачун.

²⁷ Зу җымуҗя Хўда җочў Гәҗяди ёнзы ба таму зохали, ба нанжын дэ нүжын зохали.²⁸ Хўда ги таму панвонли холи зэмусы фәди:

– Ниму сын-ёнчи, вон дуәни йинчи, ба димян җанман зэмусы гуан та; гуан хэниди йү, тяншоди чёр дэ йиче димянди хуәвар.

²⁹ Хўда фәсы:

– Вә ги ниму ба йиче ги зырди цомё, йиче ги зырди фуди готян гидини, җё ниму чыни.³⁰ Ги димянди есын, тяншонди чёр, йиче пачун дэ ю минди хуәвар, – Вә ба чинцо дэ цэфи гидини, җё таму чыни.

Зу җымуҗя чынли.³¹ Хўда ба Гәҗя зохади йиче дунщи канли – саду тэ холи. Хушон долэли, ганзо е долэли – җысы ди лю тян.