«Руах» яха жугтий дош массехк маӀан долаш да: «са», «мух», «садахар».
John.1.1
Matt.19.4; Mark.10.6
Справочные Материалы

Доладалар

Сулейма-пайхамара кицаш

Библена таржам дара Институт

Москва, 2015

Доладалар

Сулейма-пайхамара кицаш

Укх кинижка аудиозаписаш шоана короргья Библена таржам дара института сайта тӀа укх адресагӀа:
http: ibt.org.ru/ru/media?id=ING
Шоашта хетар ала: ibt_inform ibt.org.ru
9-чеи, 135-чеи, 243-чеи оагӀонаш тӀара сурташ © BFBS, 1994
245-ча оагӀон тӀара карта © UBS, 1999
ISBN 978-5-93943-249-8
© Институт перевода Библии, 2018

Дешхьалхе

Хьамсара кинижка дешархой!

Шоана хьалхашка дадараш цхьана кепатеха арахийца Дезача Йоазоний ши кинижка да: Доладалари Сулейма-пайхамара кицаши. Ер дуне хьа мишта хиннад, къа мишта даьннад укх дунен тӀа, мишта волавеннав Даьла наха Ше вовзийта яхача хаттарашта жоп луш да Доладалар яха кинижка. ХӀаьта Кицаш яха кинижка нах, къаьстта кагийнах, укх дунен тӀа баха а лела а Ӏомабеш да. Цун хьехамашка ладийгӀачар вахар гӀоза а аьттув болаш а хургда, Даьла раьза волаш а хургда.
Дезача Йоазонаш – из укх дунен тӀа эггара дукхагӀа дешаш а чӀоагӀагӀа лоархӀаш а долча кинижкайх цаӀ да, цудухьа хӀаравар таро йолаш хила веза ший меттала ер йоазонаш деша, укх дунен тӀа моллагӀча моттиге из вахе а, моллагӀа ди цо лелабой а, моллагӀча къамах из вале а. Мичара хьадоагӀа вай, сенна дах вай, укх дунен тӀа сел дукха эгӀазло хӀаний, фу хургда саг венначул тӀехьагӀа, яхараш мо долча массехана наха дагадаьхкача хаттарашта жоп луш да Деза Йоазонаш. Уж Деза Йоазонаш – кераста дина керттера кинижка да, цхьабакъда, из духхьала кераста ди лелабеча наха лаьрхӀа яздаьд аьнна хетараш гӀалат ба. Дезача Йоазоний дуккха доакъош бусалба наха а деза лоархӀаш да. i
Кераста дин йоазонаш тӀа жугтий халкъан Деза Йоазонех Шира Васкет оал. Цу Ширача Васкете чудоагӀаш да тайп-тайпарча автораша яьздаь дукха тайп-тайпара кинижкаш. Царех дукхагӀдараш жугтий къаьнарча меттала яьздаь да. Ширача Васкета цхьадола доакъош яьздаь 3 эзар шу совггӀа ха я. Ширача Васкете чудоагӀаш да исторехи бокъонехи дола кинижкаш, поэзи, хьаькъал долча наьха хьехамаш, хургдар дувцаш дола кинижкаш. Уж кинижкаш шоайла чӀоагӀа эргаш дале а, цу йоазонаш тӀа долаш да юкъара дешаш а: Даллеи жугтий халкъаи юкъера гӀулакхаш, царна юкъе Дала леладаь хӀамаш, деррига халкъаш даькъалде Даьла лоӀам хилар, халкъ Шийх тешаш а Ше яхар деш а хиларга догдоахаш Из хилар.
Укх издане чудоагӀача хӀара кинижка тӀа я лоацца дешхьалхле, хӀаьта цу дешхьалхе тӀа дувц кинижка керттерча чулоацамах, из вӀашагӀдоллара бахьанех, цу тӀа яздеча хӀамай исторе оагӀонех. Йоазув йистедоаллаш ширача ханашка хиннача доазоний карта да, ширача ханашка укх дуненах хиннача кхетама диаграмма я, цхьаццайолча лоархӀамеча Даьла цӀерий список я, Кицай кинижкий темаш я белгалъяьха.
Дезача Йоазонашта тайп-тайпарча къамий меттала таржам дара болх дӀахьош йолча Библена таржам деча Институто хоза а хеташ таро лу гӀалгӀай дешархошта Деза Йоазонаш тӀа дувцар шоай наьна меттала деша.
2005 шера Библена таржам деча Институто гӀалгӀай меттала арахийцар «Лукас бена хоза кхаъ» яха кинижка (юхакепатехад 2007-ча шера). 2015-ча шера кепатехад Юнус-пайхамарахи, Руфихи, Эстарахи дола кинижкаш. Электронни форматах дола цу кинижкай таржамаш Библена таржам дара йолча Института сайта чу да укх адресах: http: ibt.org.ru/ru/media?id=ING. Цу кинижкай аудиозапись а я цу сайта чу. ТӀехьа тӀайоагӀача хана кхы таржам деш ара мел доала кинижка а цу адресагӀа корадоагӀаргда.
Укх кинижка аудиозапись е лерхӀ оаха. Из кийча йолча хана из хургья Библена таржам дара института сайта тӀа.
Библена таржам дара йолча Институто баркал оал таржам даьрашта, редакторашта, Деза Йоазоний ер ши кинижка гӀалгӀай меттала арадаккха новкъостал мел даьрашта.
Библена таржам дара Институт

Доладалар

Доладалара кинижка дешхьалхе

Доладалар Дезача Йоазоний хьалхара кинижка а, Товрата хьалхара дакъа а да. Товрата тӀа дувц Мувса-пайхамарга а цунна тӀехьалаттачарга а Дала дайта вахӀи. Доладалар жугтий меттала дӀаяьздаь а хиннад, хьагучох, ший къаьстта цӀи йолаш а хиннадац. Цу кинижка кхыча меттала таржам деча хана пайда эц джелтий (грекий) меттала эггара хьалха таржам деча хана цунна енна хиннача цӀерах, хӀаьта цу цӀера маӀан цхьаькха а да: «хьакхоллар», «хьахилар». Цу кинижка 50 корта ба, шоай темашка хьежача, керттерча шин даькъе бекъа а мегаргболаш. Хьалхарча 11 керташка дувц Дала ший Дешаца дуне хьакхоллар, цу дунен тӀа деррига дика а долаш: сигленаш, лаьтта, гаьнаш, баьцаш, хьайбаш, хьалхара нах – Адами Хьаваи. Адамои Хьаваси, Дала шоашка аьнначунга ла а ца дувгӀаш, шоаш бахаш болча Ялсмала ягӀача дика-во довзийтара гаьн тӀара сом биаб, хӀаьта цу хӀаманца къа дунен тӀа даьккхад. Нах Дала яхар ца а деш, шоай лоӀамах баха ловш хилар бахьан долаш, Дала дика долаш хьакхелла дуне талха доладеннад. Гучаяьннай эгӀазал, низбар, нах боабар, Ӏоажал, сонтал, наха шоаш хестабар. «Доладалар» кинижка тӀа дувц Адама берий – Къаимеи ХӀабилеи вахарах, Нухь-пайхамарах, къинойх хьалдиза дуне къайладоаккхаш Дала хий дайтарах. Из хий дарах, Нухь-пайхамара шийца кема тӀа хьаийцараш мара ца дусаш, укх дунен тӀа мел дола дийнат денна дӀадаьлар. Бабила гӀала йоттарах долча дувцаро хойт, шоай оамалца сонтал гойтача хьалхарча наха Дала таӀазар мишта дир.
Доладалара шоллагӀча даькъо – 12-ча кертагара 50-ча кертага кхаччалца долча – дувц укх телхача Ший дунен тӀа лостам бе Даьла оттарах. Массехк сага Ше бӀаргавайтар Цо, уж нах даькъал а бир Цо, царга гӀолла а цар тӀехьенга гӀолла а деррига дуне даькъалхургдолаш. Уж бар жугтий халкъа дай. Царех къаьстта лоархӀам болаш ва ИбрахӀам-пайхамар.
Ший дунен тӀара ха кхоачаяллалца Даьлах чӀоагӀа тешаш хиннав из, хӀаьта Дала шийга аьлча (из зера духьа) ший дукхавеза воӀ Даьла духьа ве а кийча хиннав из. Цул тӀехьагӀа Дала дув биаб цунна, Ше из даькъалвергва аьнна а, цун фу Ше сигалара седкъий миссел, форда чура гӀум миссел дебадергда аьнна а, цун моастагӀий шахьараш цун тӀехьено караерзаергья аьнна а, укх лаьттан букъ тӀа мел дола халкъаш цун фунца даькъалхургда аьнна а, Ший оазага цо ладувгӀар бахьан долаш (Доладалар 22:17-18).
Цу кинижка тӀа ИбрахӀам-пайхамара шин виӀий, Исхьакхеи ИсмаӀалеи вахарах лаьца дола сакъердаме дувцараш а да. ИсмаӀал Ӏарбий къаман да хиннав. ИбрахӀама виӀий Исхьакха воӀо Йоакъапа ший къонгашка гӀолла жугтий шийтта ваьр дӀадоладаьд. Уж баха хайшаб КенаӀан оалача моттиге. Дала тӀехдоккха декхар хьалхашка а оттадаь, доккхий гӀулакхаш кхоачашде аьнна хержа халкъ санна бувц уж цу кинижка тӀа. КенаӀана лаьтта хьахинна жугтий къам шийх хьадаьнна Йоакъап цу тӀа вувц «Исраил» аьле цӀи йоаккхаш а.
Доладалара тӀеххьара кертош тӀа йувц Йоакъапа зӀамагӀволча виӀий Ювсапа кхел. Ювсап кӀаьнк волча хана вежараша Мисар мехка вохк лай санна. Цхьабакъда, ший вахаре нийс мел енна халонаш Даьла новкъосталца йистар а яьхий, из лакхача даржага кхоач, пирӀов дӀаваьлча шоллагӀвола Мисар-мехка кулгалхо хул цох, тӀаккха, моцал еча ший гаргара нах исраилхой а кхы дуккха халкъаш а кӀалхара доах цо.
Доладалара шоллагӀча даькъа тӀа дувц жугтий халкъа дай шоашта юкъе дулх-цӀийх йолча гаргалон бувзам хиларал совгӀа, дезалгара дезалга а доалаш долча, Дала шоаш даькъалбарца хинна бувзам болаш а болга.
Чулоацам
Сигленаши лаьттеи хьакхоллар (1:1–2:3)
Адами Хьаваи. Адамо хьалхара къа дар (2:4–4:26)
Адама тӀехье (5:1-32)
Нухьахи лаьтта хий тӀадаларахи дувцар (6:1–9:29)
Нухьа къонгий тӀехье. Бабила гӀала йоттар (10:1–11:26)
Ибрамах/ИбрахӀамах дувцар (11:27–23:20)
Дала шоашта лургда аьннача лаьтта баха ховшар (11:27–12:20)
Ибрами Лути (13:1–14:24)
Дала Ибрамаца барт бар (15:1–18:15)
Седам-шахьар а Ӏамор-шахьар а йохаяр (18:16–20:18)
Исхьакх дунен чу валар. ИбрахӀам тешаш хилар зер (21:1–23:20)
Исхьакхах дувцар (24:1–26:35)
Исхьакхи РабиӀати. ИбрахӀам кхалхар (24:1–25:18)
Исхьакха къонгаш: Йоакъапи Ӏесави (25:19-34)
Исхьакхи Або-Малики (26:1-35)
Йоакъапах дувцар (27:1–35:29)
Йоакъапа Исхьакхага ше даькъалвайтар (27:1-40)
Йоакъап Лаван волча вадар (27:41–30:43)
Йоакъап КенаӀане юхавахар. Ӏесаваца машар бар (31:1–33:20)
Динай чӀир лехар. Исхьакх кхалхар (34:1–35:29)
Ӏесава тӀехье (36:1-43)
Ювсапах дувцар (37:1–50:26)
Ювсапи, цун вежарийи (37:1-36)
ЯхӀуди Тамарии (38:1-30)
Мисар-мехка Ювсап айвалар (39:1–41:57)
Ювсапа ший вежарашца машар бар (42:1–45:28)
Йоакъапи цун дезали Мисар-мехка дӀабахар. Йоакъапеи Ювсапеи вахаре тӀеххьара хиннараш (46:1–50:26)


гӀалгӀай мотт
Institute for Bible Translation, Moscow
Доладалар, Сулейма-пайхамара кицаш (ISBN 978-5-93943-249-8). Руфих, Эстарах дола йоазонаш, Юнус пайхамарах (ISBN 978-5-93943-205-4). Ӏийсас бена, Яхьяс дӀаязбаь Хоза Кхаъ (ISBN 978-5-93943-297-9)
Доладалар, Руфи, Эстар, Сулейма-пайхамара кицаш, Юнус, Яхья

Creative Commons: BY-ND 4.0: © Институт перевода Библии; Информацию о лицензии этого издания можно найти здесь: https://wiki.creativecommons.org/images/d/d4/Attribution_3.0_%D0%A1%D0%A1_BY-ND_rus.pdf

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
back
close
Go to next chapter Go to previous chapter
:
Highlight next verse Highlight previous verse
Remove column
close
listen
download
more audio
← prev / next →

Дуне хьакхоллар

1 Юххьанца Дала сигленаши, лаьттеи хьакхеллар.2 Лаьтта даьсса а, кегаденна а дар, гобаьккха кӀоарга хий а, Ӏаьржа боадо а яр, Даьла Са хиш тӀа гӀолла лелаш дар.
3 Дала аьлар: «Хийла сердал». ТӀаккха сердал хилар.4 Даьла хьежача, Цунна из сердал дика хийтар. Дала сердал боадонах къоастайир.5 Сердалах Дала «ди» аьлар, боадох «бийса» аьлар.
Иштта, сайре а хилар, Ӏуйре а хилар, – хьалхара ди.
6 Дала аьлар: «Хий шин даькъа декъаш моартал хийла».7 Иштта хинна дӀаэттар. Дала моартал кхеллар, цун кӀалхара хиши цун тӀера хиши шоайла къоастадеш.8 Цу моарталах Дала «сигале» аьлар.
Сайре а хилар, Ӏуйре а хилар, шоллагӀа ди.
9 ТӀаккха аьлар Дала: «Сигален кӀала мел дола хиш цхьан метте вӀашагӀкхеталда, екъа моттиг а гучайоалийла». Из иштта хилар.10 Екъача моттигах Дала «лаьтта» аьлар, вӀашагӀкхийттача хих «фордаш» аьлар. Из деррига бӀаргадайча, Далла из дика хийтар.
11 ТӀаккха Дала аьлар: «Лаьтто ший букъ тӀа дегӀайоалайойла ший фу ше тоссаш йола тайп-тайпара баьцовгӀаш, тайп-тайпара котӀаргаш, шийца ший генарг дола, сом луш йола тайп-тайпара гаьнаш». Иштта хилар.12 Лаьтто ший букъ тӀа дӀегӀайоалайир шоай фу шоаш тоссаш йола тайп-тайпара баьцовгӀаш, тайп-тайпара котӀаргаш, шийца ший генарг дола, шийна тара сом луш йола тайп-тайпара гаьнаш. ТӀаккха дайра Далла из дика долга.
13 Хилар сайре, хилар Ӏуйре, – кхоалагӀа ди.
14 ТӀаккха аьлар Дала: «Хийла сигален моартал тӀа сердалонаш, ди-бийса шоайла къоастадергдолаш, ханаш, денош, шераш белгалдергдолаш.15 Лаьттан тӀехь сердал тела сигален моартал тӀа сердалонаш хийла царех». Иштта хинна дӀаэттар.16 ТӀаккха Дала кхеллар совйоккха ши сердало, йоккхагӀйола сердало дийнахьа доал деш хургйолаш, зӀамагӀйола сердало бийсан доал деш хургйолаш. Седкъий а кхеллар сигала.17 Уж Дала дӀанийс а дир сигала, лаьттан тӀехь сердал тергйолаш,18 дийнахьеи бийсани доал де а, сердал боадонах къоастае а. Далла дайра, из деррига дика долга.
19 Сайре а хилар, Ӏуйре а хилар, – диълагӀа ди.
20 Дала аьлар: «Дийнатех хьалдузалда хий, лаьттан тӀехь сигала гӀолла лелалда оалхазараш».
21 Иштта кхеллар Дала фордашкара сов-доккха дийнаташ, фордаш хьалдизза мел лела дийнаташ, деррига тайп-тайпара оалхазараш. БӀаргадайра Далла из дика долга.22 Цо уж даькъалдеш аьлар: «Дебалда шо, тӀехье беркате а хулаш, фордашкара хиш хьалдузаш, хӀаьта оалхазараш лаьттан тӀехь дебалда».
23 Хилар сайре а, хилар Ӏуйре а – пхелагӀа ди.
24 Дала аьлар: «Лаьтто ший букъ тӀа дегӀадоаладолда дийна синош ши-ший тайпашца – доахан а, текхаргаш а, лаьтта гӀолла мел лела дийнаташ а». Иштта хинна дӀаэттар.25 Ши-ший тайпара лаьттара хьайбаш а, доахан а, лаьттара текхаргаш а кхеллар Дала. Далла из дика хийтар.
26 ТӀаккха Дала аьлар: «Кхолларгда адам, воай сибатагӀа сибат денна, воашта тара долаш, доал долда цар хи чурча чкъаьрашта, сигларча оалхазарашта, доаханна, дерригача лаьтта, текхаргашта, лаьтта гӀолла текхача».
27 Иштта кхеллар Дала адам, Ший сибатагӀа сибат денна,
Даьла сибатагӀа сибат денна кхеллар Цо из;
маӀеи кхали болаш кхеллар Цо уж.
28 Къоабалбир уж Дала, аьлар царга Дала: «Дебалелаш, дукхагӀа хилалаш, лаьтта хьалдизалаш, лаьттан доал делаш, хи чурча чкъаьраштеи, сигларча оалхазараштеи, лаьтта гӀолла мел лелача хьайбаштеи оалол делаш».
29 ДӀахо аьлар Дала: «Хьажал, Шоана лу Аз дерригача лаьтта тӀа мел йола ший фу ше тоссаш йола буц, ший генарг ший сома юкъе доалла сомий гаьнаш, – шоана хилба царех кхача.30 Лаьтта тӀа мел долча оакхарашта, сигала мел долча оалхазарашта, лаьтта тӀа гӀолла текхарашта, дийна са чудоаллача шеддолча дийнаташта, масса тайпара гӀа-буц шоана кхачан лаьрхӀа лу Аз». Хилар иштта.
31 Ше мел даьр дайра Далла, хӀаьта из деррига тӀехдика долга а дайра. Хилар сайре, хилар Ӏуйре, – ялхлагӀа ди.
← prev / next →
© 1999-2023 Institute for Bible Translation