1 Сулейманын, Давудни духайн, Израилни падишагьын, ивгьойбы.
2 Манбы одкІунийнбы ацІаал’на насийгьаІт вацІавхьа, тербие кьабыл’ гьаъасди мей;
3 аІкІеликван къайдабы хаІр хъихьа, аІдалатни, инсафни, гьаІкьийкьаІтни мей;
4 Джегьилершис башда вухьай, джаванаршис одкІунийнбы ацІахьайни мей.
5 Гьассыре аІкІелнанбишед кІыр-гядхъы ацІаал’ гьеххеъэджен, башда воохьенбишед хайирысын тадбырбы алятІасынбы.
6 Ини къайдайл манбишикІле аІкІелнанбише ивгьойнбы: мисалбыйий аягьна гаф, манчин кал’мабийий тапмаджебыд ацІахьесынбы.
7 АцІаалин оІги ГІынишена гичІобна,
вугьнуцІарше меб ацІаалийий тербие рычхантылхъа сакІалаъа.
8 КІыры гьиле, йизда дих, йигъни деккини насийгьаІтиле,
един тербие йикІеле акІан гьимаъа.
9 Манбы йигъни вукІлен тадж,
хуІвайныд безек водон.
10 Дихав! бынагькараршис гъу азмиш гьаъас ыккыйкыней,
манбишис имкан гьимооле.
11 Агар вакІле ивгьуей: «Шаквасана дора – дюглер гозет гьау гикІас,
бынагь дешинбишдаб йаІхъ къацІаакІванас;
12 манбы уІчІуб джегьеннемын гьооІгъанбы хьинне гьооІгъаІс,
сагъынбыб нюкьнейхъа кІявъуйнчик акар вухьес.
13 Манке гейб кьийматукана матаІгь сааъасда,
хайбы давлайквани малаква гяцІяъасынбы;
14 йигъна чоп гъу шаква санаб абчес,
карыд йишди гыргынбишихъад са ихьес».
15 Дихав! Манбишиква йаІххъылхъа имечІе,
манбишди сафарийлхъа гъу къел гимийхье;
16 наъас ву ивгьуей, манбишин къелбы зулумусхъа къадайхьван,
эб кІяаъас телесмиш эйхье.
17 Нахчираршини улеббишди оІгийл
гамаз гидхьый гьавагьийда водон;
18 наъас ву ивгьуей, манбише гозет гьавъу джо джо гябтІас,
чІенкІыб джо джос гивийхьена вобна.
19 ТІамаІъкарна йаІхъ гьаІмаше махуІбна вобна,
шавае мерункъуни малалхъа ул’ гивхьу,
шавни хылелхъаей мана гибхьу, манчин манкъун джан алятІа.
20 АцІаалин дахале он аляъа,
майданбишил чише чин сес ахты хъаъа,
21 манчин чІекІни гьай-куйнани савайлени джигабишей, хъоотІаланбы
шагьарни дарвазайле эйбачІенкъаІ, чин эхтилет эйгье:
22 «Мусамейне шу, джегьилейр, вушда джегьилийвалла вуккуйканас?
мусамейне гьаІйасызар гьаІйасызыйваликва шадебхьес?
Мусамейне вугьнуцІаршис ацІаал’ дийканас?
23 Зы гьаъан рычхант шу къабыл’ гьауей,
манке йизын йикІ зы шолхъа ачмиш гьаъасын,
йизын гыргын фыкырбы шолхъа гьихьарасынбы.
24 Зы шу хъобтІулыйнбы, шу мед кІыр-гидяххъийн;
шолхъа хыл’ гьодкыйнкъаІ, ман адхъаххъана дехьана;
25 йизын гыргыда тадбирбы шу кьабыл’ гьидяийнбы,
манбишиле гьаъан рычхантбыд фыкырейхъа ил’датІийнбы.
26 Мани сабабын вушди гьалак вухьайле зы ахъаІна гьаъас,
шолхъа хъаІдкьыІний хъадыйнкъаІ, шадхьесда зы.
27 Манке шолхъа тІуфан, дагъамийвал’бы духур хьинне хъалес;
манке уцІурий даркашийвалла шол’ угъа вухьес.
28 Манке шу зы хъотІулыйнкъаІ, закІле вушун сес къайхьес деш:
мичІейлийке тІабал’ гьауейр, шосхъа зы авайкес деш.
29 Наъас ву ивгьуе, манбишис ацІаал’ къаджес ыккыйкын деш,
ГІынишена гичІиб джо сечмиш гьавъу деш,
30 йизда маслягьаІтыб кьаблявъу деш,
йизди гыргыни рычхантбишиле аІйиб гьау.
31 Мани сабабын джо гьобгьурни йаІххъына бар оохьанас,
джони нягьаІкьни фыкырбишди маІгьсулун аацІес.
32 Мани сабабын кІыры гьиделен джегьилер гябтІасынбы,
вугьнуцІаршини фыкыр гьидёвийн манбы гьалакааъасынбы.
33 Захъа кІыры гьеленбы хата дена,
динджиба, аІзабыке хъыІдяакьаІн гудмиш вухьес».
