text | ibt.org.ru

¹ Уулум! Менин сөздөрүмдү сакта, осуяттарымды катып ал.

² Менин осуяттарымды сакта жана жаша, менин акыл-насааттарымды көзүңдүн карегиндей сакта.

³ Аларды колуңа байлап ал, жүрөгүңдүн лоокторуна жазып ал.

⁴ Акылмандыкка: «Сен менин карындашымсың», – де, акылга: «Сен менин бир тууганымсың», – де.

⁵ Булар сени башка бирөөнүн аялынан, жылуу сүйлөгөн бөтөн аялдан сактайт.

⁶ Бир күнү мен үйүмдүн терезесинен, тордон карап турдум.

⁷ Ошондо тажрыйбасыз жаштар арасынан акылсыз жаш уланды көрүп калдым.

⁸ Ал бузулган аял турган бурчтун жанындагы аянттан өтүп, ошол аялдын үйүнө барчу жолдо бара жатты.

⁹ Ошол убак күн батып, күүгүм кирип, караңгы боло баштаган убак эле.

¹⁰ Мына ошондо анын алдынан бузулган аялдын кийимин кийген, амалкөй,

¹¹ чуулгандуу, жүгөнсүз бир аял чыкты, ал үйүндө турбайт.

¹² Ал бирде көчөдө, бирде аянтта, ар кайсы бурчта туруп алып, тузак тартат.

¹³ Ал жаш уланды кармап алып өөп, уялбастан ага мындай деди:

¹⁴ «Мен тынчтык курмандыгын чалдым, берген убадаларымды бүгүн аткардым.

¹⁵ Ошондуктан сени тосуп чыктым, сени издеп чыгып таап алдым.

¹⁶ Килемдерди, Мисирдин түркүн түстүү кездемелерин төшөп, төшөк салдым.

¹⁷ Уктоочу бөлмөмдү смирна, алой жана корица менен аңкытып койдум.

¹⁸ Үйгө кир, таң атканча эркелешип, сүйүүгө ыракаттанабыз.

¹⁹ Анткени күйөөм үйдө жок, ал узак сапарга кеткен.

²⁰ Күмүшкө толгон капчыгын ала кеткен, үйгө ай толгон күнү келет».

²¹ Ал жаш уланды көптөгөн жылуу сөздөр менен азгырып, жылуу жумшак сүйлөп, бийлеп алды.

²² Ошол замат жаш улан союларын билбеген өгүздөй болуп, боорун жебе тешип кетерин, атыларын билбеген бугудай болуп, аялдын артынан жөнөдү.

²³ Ал куштай болуп, торго жулунат, тор анын өлүмү үчүн жайылганын билбейт.

²⁴ Ошентип, балдарым, мага кулак салгыла, менин сөздөрүмө көңүл бургула.

²⁵ Жүрөгүң ал аялдын жолуна бурулбасын, анын жолуна түшүп адашпагын.

²⁶ Анткени ал аял далайларды жарадар кылып кулаткан, көптөгөн күчтүү адамдар ал аялдын колунан өлүшкөн.

²⁷ Анын үйү – өлүмдүн ички бөлмөлөрүнө түшүрө турган, өлгөндөр жаткан жайга алып барчу жол.

Sprachen