TBN:Luke.1.5; TBN:Luke.2.4-Luke.2.7; TBN:John.7.42
TBN:Jer.23.5; TBN:Num.24.17
TBN:2Sam.5.2; TBN:Mic.5.2
TBN:Exod.30.23; TBN:Song.3.6; TBN:Isa.60.6; TBN:John.19.39
TBN:Gen.20.6
TBN:Hos.11.1; TBN:Matt.1.22
TBN:Matt.27.9
TBN:Jer.31.15
TBN:Luke.1.26; TBN:Luke.2.39; TBN:John.1.45

Сифте гаф

Гьюрматлу дустар!
Учвухь хьайи му «ЦІийи Йикьрар» кІуру Китаб Аллагьдин гирами китабдин кьюбпи пай ву.
Сабпи пай, Кюгьне Йикьрар, мегьел жугьуд чІалнаан ихь чІалназ илтІибкІнадар. Дидин кІулин мяна-метлеб, сар касди, Адамди, учв халкь гъапІу Аллагьди кІуруб дарапІди, фици гьадгъулантина гъабхьи вари инсаният гунагьвалиъ абхънуш ва гьадму гунгьиккан адмийир уьрхбан бадали гьапІну ккундуш, улупуб ву. Яни Дугъу Чаз Чан хусуси халкьди жугьдар ктагъуру, дурарихъди Йикьрар йитІну, Къанун дебккру, хъа дурарихьан думу Йикьрар, Къанундиъ улупнайиси, кІулиз адагъуз гъабхьундар. Дурари, чпин терефнаан, Йикьрар тамам апІури гъахьундар кІури, Аллагьра, дурариз дилигну, Чав кІуруб тамам апІбахьан гьудучІвундар. Жугьдарихъди йитІнайи Йикьрарилантина вари инсаниятдиз дубхьну ккуни уж’вал Аллагьди тамам апІури имийи. Гьамус Дугъу жугьдарихъди ваъ, хъа вари инсанарихъди ЦІийи Йикьрар йитІну ккундийи. ЦІийи Йикьрар чпин ихтиярнаъ учІвган, сабпи Йикьрар йирсивализ, яни кюгьневализ илтІикІнийи.
Аммаки, гьадму Кюгьне Йикьрарна Къанун инсанариз, чпин удудукьрувал ва чиб-чпиинди чпин гунгьариан удучІвуз даршлувал улупуз кІури, ЦІийи Йикьрарихъ хъапІрайи рякътІан дайи. Ари гьадму Кюгьне Йикьрариъ жугьуд халкьдихъди улхури гъахьи Аллагь гьаму ЦІийи Йикьрариъра, инсанарин арайиз дуфну, Учв адмиси адмийирихъди улхури гъахьну ва гьамус, гъиямат йигъаз хъана гъюрза дупну гаф тувну, аьршариз душна.
Думу адмийиригъна гьаз гъафну? Кюгьне Йикьрариъ Къанундиинди гьарсар касди чан гунгьихъанди мал гъурбан дапІну ккундийи, гьякьди апІуруш, гунагь гъапІур аьжализ тувну ккундийи, хъа Аллагьдиз гьарсар кас масанди ву: Дугъу, инсан чІивиди гъитну, гьадгъан гунгьарихъанди маларин ифи удубзуз гъитру, эгер гунагь гъапІу гьар касдин ифи удубзуйиш, дюн’яйиин гьич сар каскьан гъузидайи, гьаддиз инсандихъанди инсандин гунгьин жаза малариин алабхъуру.
Аллагьдиз инсанар гьадмукьан ккун гъахьнушра, дурар гунгьарихъан хътакундар. Фукьанна фукьан ва фукьандизкьан гьич саб тахсир ктру маларин ифи удубзури хьидихъа! Аллагьдиз инсан гьадмукьан масанди вуйиган, Дугъу дурарихьан гъиямат йигъан Чан улихь гьич саб тахсир ктарди дугъужвуз шлуси, саб ужу шлу рякъ ктабгъну ккундийи. Сар балайикк ккахънайиган, думу ккунири гьапІну ккунду? Дюз вучва, жвуван жан гьяйиф дапІну ккундар; ари Чав халкь гъапІу инсан масан гъапІу Аллагьдира, гунгьариъ кІулихъди арснайи инсан марцц апІбан бадали, Чан жан гьяйиф дарапІди, варидарихъанди сар Учв гъурбан гъахьну. Дугъу гъапІу ужувлаз дилигну, гьар шли Думура гьаци ккун гъапІиш, дицир Дугъахъди гьаммишандиз женнетдиъ ахъди. Жараси женнетагьли хьуз шлуб дар.
Ари Аллагьдин гьадму ужувлакан ктибтурайи Гирами китабдин кьюбпи пайназ ЦІийи Йикьрар кІуру. Душваъ Аллагьдин гьадму ужувлакан ва Дугъан веледар хьпан бадали, инсанари гьапІну ккундуш, ктибтура. Аллагьди, Чав гъапІу ужувлакан вари инсаниятдиз хабар дебккай, гъапну, ари гьадму Хабар – ЦІийи Йикьрар, учу, табасаран чІалназ илтІибкІу Рашид Азизовди, гъалатІар ктагъу Шарафудин Дашдемировди, Шамиль Казиевди, Сабрина Шихалиевайи, Михаил Алексеевди ва Гирами китабар илтІикІру институтдин, бицІирилан ккебгъну, вари гъулугъчйири табасаран халкьдиз дебккрача.
ЦІийи Йикьрарнаъ улупнайи гьядисйир хьуз хъюгъхъанмина, яни думу Уж’вал инсаниятдиз дебккхъанмина кьюд агъзур йистІан зиина гъубшну. ЦІийи Йикьрарин пай гьадму гьядисйир чпин улариз гъяркъю шагьидари грек чІалниинди дибикІнайи Гирами китаб ву. Дидин хъана уччвуйи гъавриъ ахъруси, Китабдин ахириъ, алахьру читин гафарин мяна ачухъ апІурайи словарь ва гьядисйир наан шули гъахьнуш гъавриъ тІаърайи шиклар, схемйир ва картйир туврача.
ЦІийи Йикьрар 27 Китабдикан ибарат дубхьнайи саб гъварч ву, ва, урхрудариз сацІиб гъавриъ ахъуз кюмек ибшри дупну, гьар Гирами китабдин улихь дидкан жикъидиси мялуматра туврача.
Библия илтІибкІру институтди думу табасаран чІалназ илтІибкІдариз, дидин редакторариз ва думу адабгъуз кюмек гъапІдариз – варидариз чухсагъул кІура. Табасаранариз чпин багъри чІалниинди Аллагьдин Гаф урхуз мумкинвал хьувалиин учу шад вуча.

Библия илтІикІру институт

МАТТАЙИ КТИБТУ УЖУВЛАН ХАБАР

Аллагьди гъапІу гьадму гьядисйирин вахтари Рим гьюкуматдиз налогар уч апІури гъахьи гъуллугъчи Маттайи чаин улубкьуб Гирами Рюгьнан хиликкди гьаму Китабдиъ ктибтура. Китаб 60-пи – 65-пи йисари гъибикІуб вуди гьисаб апІура. Саб ражари, чан гьарганси, налогар уч апІури чан йишв’ин деънайи Матта Исайиз рякъюру. Гьаму вахтнахъанмина Маттайин уьмур асуллагь дигиш шулу. Думу сарун Исайихъан, шагьрар гъулар вуйибси лицури, зат хътакури гъахьундар. Матта чав дикІурайи Ужувлан хабарнаъ улупнайи гьядисйирин шагьид гъахьну. Дугъу Иса, гаф тувну, гьаму дюн’я уьбхюз дуфнайи Уьрхрур вуйивал тастикь апІури, Кюгьне Йикьрариан гизаф йишвар улупура. Хъа Кюгьне Йикьрариъ, Уьрхрур гъиди кІури, улихьмиди дупну айи. Му Ужувлан хабарнаъ Иса гьаму дюн’яйиъ мясляаьт дебккуз Аллагьди гьаънайи Месигь вуди улупура. Аьршарин Адашди гьаънайи Исайи Чаз тувнайи гьюкум Аллагьдиси ишлетмиш апІуйи. Мушваъ Исайин улхбар йирхьуб пайназ жара апІуз шулу:
1. Дагъдиин туву аьгъювалар (5-6-пи кІулар);
2. Исайи Чан терефкрариз туву табшуругъ (10-пи кІул);
3. Аьршарин гьюкмикан тахалус (13-пи кІул);
4. Чан терефкрариз лазим насигьятар (18-пи кІул);
5. Фарисеярин иблисвал ва дюн’яйиин улукьру гьядисйир (23-25-пи кІулар).


ЦІийи Йикьрар
http://ibt.org.ru/bible
Новый Завет на табасаранском языке ЦІийи Йикьрар
Фикрар-хиялариз: ibt_inform@ibt.org.ru
ISBN 978-5-93943-149-1
© Институт перевода Библии, Москва, 2010



Copyrighted: © Институт перевода Библии, Москва, 2010

Институт перевода Библии
Институт перевода Библии, 101000 Москва, Главпочтамт, а/я 360
ibt_inform@ibt.org.ru
назад
закрыть
:

Исайихьна гъафи аьяндрар

1 Иса Гьирод паччагьдин девриъ Ягьудия уьлкейиъ айи Вифлеем кІуру шагьриъ бабкан гъахьнийи. Магьа, Ерусалимдиз ригъгьудубчІвру терефнахъан аьяндрар гъюру.
2 Дурари гьерхру: «Ягьудияйин паччагь хьуз пну бабкан гъашир нашди? Дугъкан хабар туврайи хяд ригъгьудубчІвру терефнаъ кабхьну гъябкъюнчуз, ва Дугъаз икрам апІуз гъафунча».
3 Му гафар гъеерхьган, Гьирод паччагьдик ва Ерусалимдин агьалйирик гъалабулугъ кабхъру.
4 Думуган Гьиродди, жугьдарин вари аьхюну маллйир ва къанунчйир уч дапІну, дурарихьан, Месигь наан бабкан духьну ккунир вуйи, – пну, гьерхру.
5 – Ягьудияйин Вифлеем шагьриъ, – жаваб тувру дурари, – фицики Пайгъамбрин Китабдиъ дибикІна:
6 «Увура, Вифлеем, Ягьудия юрднан шагьрарин арайиъ сабдииндира бицІиб дарва, фицики ув’ан удучІвиди Йиз Израилин халкь уьрхру Аьхюр».
7 Думуган Гьиродди, дуфнайи аьяндрариз жиниди дих дапІну, дурарихьан хяд гьудубчІвру вахт гьерхну, дюзди аьгъю апІуру.8 Ва, дурар Вифлеемдиз рякъюъ тІаъри, гьамци кІуру: «Душну БицІирин гьякьнаан вари уччвуди аьгъю апІинай. Хъа учвуз Думу гъидихъган, узузра хабар дебккай, узхьанна, душну, Дугъаз икрам апІуз шлуганси».9 Паччагьдихъ хъебехъну, дурар рякъюъ учІвру. Ва магьа завун ригъгьудубчІвру терефнаъ чпиз гъябкъю хяд, тап БицІир айи йишв’ина дубшну дийибгъайизкьан, дурарин улихьди гъябгъюру.10 Аьяндрар, хяд гъябкъган, кьадар адрубкьан шад гъахьнийи.11 Ва хулаъ учІвган, дурариз БицІирна Дугъан дада Мар’ям рякъюру ва жил’ина ис духьну, Дугъаз икрам апІуру. Хъасин, чпин пешкешар адагъну, БицІириз тувру: гъизил, ладан кІуру ицци ниъ хъайи ягъ ва смирна кІуру багьалу дармансиб шейъ.12 Ва Гьироддихьна кьяляхъ махъадаканай кІури нивкІукди дябкъну, аьяндрар жара рякъюъди чпин юрдариз гъягъюру.

Египетдиз гьергну гъягъюб

13 Дурар гъушхъан, магьа Юсуфдиз нивкІукди малайикди дуфну кІуру: «Гъудужв, БицІирна Дугъан дада увухъди гъадагъну, Египетдиз гьергну гъарах ва узу увуз хабар апІайизкьан душваъ гъуз; фицики Гьироддиз, БицІир пуч апІбан бадали, Думу агуз ккунди а».
14 Юсуфра дишла, гьадму йишван гъудужвну, Исана Мар’ям гъадагъну, Египетдиз гъягъюру15 ва, Гьирод кечмиш хьайизкьан, душваъ гъузру. Гьамци, Агъайи пайгъамбрин мелзналан: «Египетдиан Узу Йиз Бализ дих гъапІунза», гъапи гафар кІулиз удучІвуз кІури, гъабхьиб вуйи.

БицІидар терг апІбан Гьироддин буйругъ

16 Ва думуган Гьирод, аьяндрари чаз кучІлар гъапІуб аьгъю дубхьну, хъюлу ацІнийи ва дугъу Вифлеемдиъна дидин аьтрафариъ айикьан кьюд йисазкьан вуйи вари жили веледар пуч апІуз чан эскрар гьаъру. Швнуд йисаъ айидар дийихну ккундуш, Гьиродди аьяндрари гъапибдиан аьгъю гъапІнийи.
17 Гьамци Еремия пайгъамбрин мелзналан дупнайи гьаму гафар кІулиз удучІвнийи:
18 «Рама шагьриъ гъал абхъна ишбан, ишларин зурба фигъан; Рахил ишура чан веледарихъ, дугъаз ккебехъуз ккунди адар, гьаз гъапиш дурар сарун имдар».

Египетдиан хъадакну гъюб

19 Хъа Гьирод кечмиш гъашихъан, Египетдиъ айи Юсуфдихьна нивкІукди Аллагьдин малайик гъюру
20 ва гьамци кІуру: «Гъудужв, БицІирна Дугъан дада гъадагъну, дурарра хъади Израилин ругариина гъарах, фицики БицІирин аьжал ккунидар гъийихну».21 Юсуф гъудужву ва, БицІирна Мар’ям гъадагъну, Израилин ругариина хъадаку.
22 Ягьудияйиъ чан адаш Гьироддин ерина дугъан бай Архелайи паччагьвал апІурайиваликан гъеебхьган, Юсуфдиз дина гъягъюз гучІ гъабхьнийи. Амма хъасин чаз нивкІукди хабар дебккган, думу Галилейин ругариина гъягъюру.
23 Ва душваз дуфну, Назарет кІуру шагьриъ бин ккебгъну. Гьамци: «Месигьдиз Назарей ччвур тувди», – кІуру пайгъамбрарин гафарра кІулиз удучІвнийи.